今年真係有少少流年不利
話說一向自覺健康寶寶既我
年頭既時候去做Body Check時先知自己身體原來唔係咁健康
果時照已經發現卵巢有個水泡
不過果時醫生話似乎係功能性卵泡囊腫
咁一般兩三個月會自行消息
醫生語氣好輕鬆
咁我都冇放係心
直至今個月既M有少少古怪地唔識停
基於公司有專科醫生保險又唔駛轉介信既一睇無妨心態
去左Book個婦科睇睇
醫生聽到情況就話應該係同壓力同荷爾蒙有關
不過都係照一照超聲波穩陣d
一照佢就發現朝早年頭果個泡泡仲未走 而且仲有大左既跡象
咁即係唔係功能性 亦代表佢唔會自己消失
醫生建議微創拎走佢
雖然而家唔算大 但養大左佢就麻煩
其實當其時我無考慮太多就應承左
因為本身係出面等果個幾鐘
我都有諗起果粒泡泡
加上當時好急尿
而醫生又幫我安排到一個好perfect既時間俾我
咁我就應承左佢喇....................
應承左同小A講返
因為好快就要入醫院喇
入院前我都有上網search下d資料
發覺好多人都係5cm呀左右先去割
都有少少懷疑自己係咪真係有咁既需要 定係個醫生貪錢
(嘩哈哈哈哈哈~~ 唔知點解個醫生一直俾我依個感覺)
不過諗諗下
自己邊有咁神心半年去照佢一次
今次如果唔係我d m 唔停
我都唔知其中一粒大得咁快
再咁大落去
如果我一年後先覆診
可能大到做唔到微創咁就麻煩
所以都係定做啦
********************************************************************
醫生掛診係浸會
比起小A年頭既法國黎講都幾貴
登記完等人帶左上房
入房前要先做登記
好彩浸會D 姑娘都好好人
幫我洗肚臍既姑娘仲引我笑
又讚我搵到個好醫生 仲話依個醫生好有經驗
做完手術病人都唔痛
令我依個第一次入醫院既鄉下妹安心不少
住婦科病房 基本房係三人一間房
$720 一晚
一分錢一分貨
設備都好法國少少
床位有私家電視令依個電視精依幾日無咁難捱
本來醫生叫我帶睡衣
搞到我仲特登買左件有胸墊既背心
($199 呀~~ 丄丄)
不過原來係有睡裙供應既
姑娘話聽朝0730 做手術
00:00 後戒口就可以
我同小A聽完 入房即叫左個肉醬意粉, 菜同埋生果盤呀
個意粉都幾好味
跟住坐多一陣 姑娘就趕人走喇
跟住姑娘叫我地早D訓
聽朝我要0630起身換衫呀
係0530既時候有個姐姐走黎問我起身未
我話未呀, 我0630先起身
跟住佢話 : 你唔好咁遲喇 而家起身喇, 今日有好多人做手術呀, 可能會好早推你落去架
我心諗：咁你頭先就黎同我講而家起身喇, 做乜問我起身未啫
換好哂衫去埋廁所我就攤係床到等人推落手術室
推落去既時候都好平靜
但一入到手術室開始有少少驚喇
個麻醉師同D姑娘傾計果時我仲搭佢嗲
但其實我隻腳有D震囉
好彩.......麻醉師俾氣我聞左三啖之後 我已經 zzzzzz
到再有意識時 已經搞掂哂
醫生仲已經幫我抆左尿喉
(網上d人話清醒抆尿喉又係一個痛苦)
九點幾返到上床姑娘話三點幾可以食粥水 仲幫我叫埋
於是我訓下醒下咁就等到小A一點黎探我喇
(中間我有企圖幾次伸手去開鎖拎電話 但太難喇)
其實手術完第一日係最尷尬
又要係床到去小便 因為姑娘要幫我地量下有幾多
(我仲要去左兩次 因為第一次姑娘無叫我搵姐姐搵 於是姐姐倒哂)
然後間中有姑娘會除左你條褲望下你傷口呀咁......
有人黎幫你洗下呀咁........
真係好尷尬
但去到後期就已經慣左......
.........................................................
因為吊糖水裡面加左止痛藥, 加上我有仲有口服同埋塞肝止痛藥
所以其實一直都唔覺得痛
(好彩.......)
到食埋夜晚果餐粥水 我就試下落地喇
(因為小A聽日唔黎呀 所以我想自己落左地先)
開頭落地都有少少暈
行十步就要返歸
但再坐一陣再試就OK左
之後就行動自如!
夜晚小A返左屋企 我仲煲劇煲到1點先訓
*********************************************************************
第二朝更加係好精神 係個人好腫囉
食通粉無問題 仲覺得好好味
(通粉 $34, 水果$33, 真係好貴)
但我食完通粉好快肚餓 於是夜晚就叫飯加菜
咁樣要 $89蚊呀
唔知係咪食得太飽呢
我夜晚胃痛 仲要基於訓得太多訓唔著
又覺得個肚脹住脹住好谷
(醫生話因為打左氣入係入面 遲d就冇事)
成三點幾先訓得著
所以出院依朝我七點幾聽到派藥我先識醒
即刻打電話去叫早餐
哈哈
（基本上已經回歸平時既我）
等醫生循例望完我2眼
10點鐘左右醫院既人就拎左張單俾我埋單
成六萬幾蚊 比我當初估算多左一萬
好彩我有保險公司承包信咋
唔係就 丄丄
跟住返上房睇住電視等小A黎
終於......完結左浸會四日三夜之旅
(同埋同六萬幾蚊講 BYE BYE)
(希望Claim得足啦)
**********************************************
之後出左院既依一晚食量回復返平時
(我磅重仲要重左 丄丄)
但第一晚回家對腳勁酸軟
依個情況去到返家後第三日先有改善
(即係術後第五日)
好彩做到微創
康復真係好快 而且都算係無痛
(我返家後第二日朝早食完止痛藥後就冇再食)
如果趕返工既
休息一星期左右返工都算係無問題
所以如果有需要做都可以唔駛太擔心
當然希望以後都可以身體健康
我同小A以後都唔駛再入醫院!
